» ed accussì iddi ristaru 'Mperaturi e 'Mperatrici e nuàtri misseri com'èramu(485).
      Palazzo-Adriano(486).
     
      VARIANTI E RISCONTRI
     
      Vedi le novelle LXXXI, LXXXIII e LXXXIV, ove sono assai punti di confronto: nella CCXXXII è il fatto del lume acceso che il marito accosta di notte alla sua bella per vederne le sembianze: questa è con lievi modificazioni la favola di Amore e e Psiche (Vedi vol. I pag. 174 [n. XVIII Lu Re d’Amuri, Varianti e riscontri – nota per l’edizione elettronica Manuzio]).
      LXXXIII.
     
      Lu malacunnutta(487).
      'Na vota si cunta e s'arriccunta ca cc'era 'na vecchia e avia un figghiu malacunnutta, chi si chiamava Peppi. Stu figghiu, travagghiari 'un ni vulia, e sò matri lu 'mpjau nni un furnaru, chi cci dava a manciari e vèstiri, senza salariu. Com'era nni stu furnaru, stu giuvini malacunnutta, ogni matina pigghiava 'na cartedda di pani, si la mittía davanti e si la manciava tutta. Lu furnaru, vidennu ca chistu lu stava cunsumannu a sulu manciari pani; — «Ih, dici, e ch'hê fari eu? chistu mi cunsuma!» — e nni lu mannau di la sò putía. Comu si nni iju di ddà, lu Peppi, si nni iju à 'mpjari nni unu pri garzuni e strigghiàricci li vèstii(488): comu junci, si metti a scupari la stadda, e 'mmenzu lu fumeri attrova un stili: chi fa? lu metti a pulizziari, e comu lu vitti lustru si lu sarvau. Lu patruni, doppu chi lu pruvau 'na pocu di jorna e lu canuscíu puru ca era manciatàriu e lagnusu, nni la mannau. Iddu va, e torna nni sò matri. — «Ah, dici sò matri, ah malacunnutta, arrè vinisti?