Una bella variante di questa fiaba è in GONZENBACH, n. 21: Die Geschichte von Caterina und ihrem Schicksal (La novella di Caterina e della sua Sorte). La invocazione della Sorte è anche nella nostra XIII. Il Köhler non trova nessun raffronto con questa novella.
      LXXXVII.
     
      Don Giuvanni Misiranti.
      Si riccunta ca cc'era 'na vota 'n Palermu stu Don Giuvanni Misiranti, ca lu jornu addisiava pani e la notti robba. 'Na jurnata, dispiratùni, niscíu fora la porta(563) e dissi: — «O Sorti mia! e accussì m'abbannunasti!» e sduna a caminari. Mentri camina, trova 'na bella fava; càlasi e si la pigghia. Ddà vicinu cc'era un pitruni; Don Giuvanni Misiranti s'assetta. Dici: — «Ora io haju truvatu sta fava; ora la chiantu; e sta fava fa un pedi di favi, e nni vennu tanti vajàni(564). Sti vajàni li siccu; all'annu li chiantu 'nta li mignani(565), e mi fannu favi cu la pala.... A li tri anni mi pigghiu 'n gabella un jardinu; chiantu sti favi, e vidi quantu mi nn'hannu a fari! A li quattr'anni m'addùu un magasenu, e io addiventu un niguzianti grossu...»
      Quannu cci parsi ad iddu si susi di lu balatuni e caminannu caminannu va fora porta S. Antuninu. Vidi 'na fila di magaseni, e 'na fimmina assittata davanti la porta di unu di chiddi. — «Bona donna, dici, si locanu sti magaseni?» — «Gnursì, cci arrispunniu dda fimmina; cu' si l'havi a 'dduari?» — «Lu mè patruni, cci dici Don Giuvanni Misiranti. Cu cu' hê essiri?» — «Cu la signura chi stà ccà susu.» Don Giuvanni pinsannu pinsannu va nn'un cumpari suo. — «Cumpari, cci dici, pi lu San Giuvanni 'un mi l'aviti a diri di no(566): m'aviti a 'mpristari pi vintiquattr'uri un vistitu vostru.