— «O furtuna scilirata, ca mi vai sempri a travirsari, ca m'hai livatu la vita, ed ora mi stai sminuzzannu lu cori muddichi muddichi! O furtuna mmaliditta, arricogghimi a lu funnu di stu mari! » E ttùffiti, si jittau a testa appuzzuni(711) 'ntra l'acqua. — Chi è, chi fu? — Un pisci russu si l'ha misu supra lu schinu e lu porta supra 'na scugghiera. — «Vatinni, cci dici, poviru marinaru, ca la furtuna è cu tia; sattìnni prufittari, e di quantu ricchizzi havi lu mari su' tutti toi.» Ddocu finíu, e di pisci chi era addiventa 'na bedda giuvina, un àncilu cu li capiddi d'oru, ca era la Sirena di lu mari. Dipoi a lu marinaru cci dici: — «Sentimi, o marinaru, si vôi li ricchizzi chi ti dissi, veni ccà ogni matina all'arba: porta cimeddi(712) e riti, e po' mi chiami e mi dici tri voti:
      «O Sirena di lu mari,
      Portami pisci rari,
      Ca eu vegnu di matinuPri piscari di cuntinu.»
      La Sirena turnau pisci russu e si sammuzzau 'ntra un fallanti(713). Lu marinaru cala riti e cimedda, e 'ntra un nenti si carricau di li megghiu pisci chi cci sianu, ca li vinníu un tisoru. Accussì ogni matina, prima d'arrispigghiarisi l'acidduzzi, iddu era a lu scògghiu; chiamava tri voti la sò Sirena, e idda in forma di pisci russu cci purtava li pisci li cchiù riali e magnifichi: e doppu tanti anni di jìri e viniri di sta manera, senza cissari mai, lu poviru marinaru addivintau lu cchiù riccu di terri, palazzi e dinari chi mai cci avía statu a chiddi parti, eArristau filici e cuntenti,
      E nui ccà senza di nenti.
      Borgetto(714).