A la sira vinni iddu, cci cuntau lu tuttu, e mancu si sintía tanta bona, chi si curcau senza manciari. Lu 'nnumani si sintía li duluri, pirchì era fattu lu tempu, e cci avìanu misu a vèniri li dogghi; iddu comu chi nun si nni avissi addunatu, niscíu e cci dissi chi a la sira turnava. Li duluri avanzavanu, quantu si 'ntisi chiamari di la Riggina, e cci dissi: — «Bona donna, cc'è la mammana, pirchì mè nora havi li dogghi; acchianati e vi faciti fari 'na visita.» Basta: idda acchianau tutta affruntata; quannu la mammana la visitau dissi chi era ura di figghiari, e di fattu figghiau, e fici un beddu figghiu màsculu e la Riggina la fici curcari ddà chi cc'era un lettu magnificu. Doppu vinni lu Re e trasíu 'ntra dda càmmara e comu la vitti curcata chiamau a sò Mamà, — «Comu, cci dissi, a ssa latra curcata ddocu l'havi?» strava(770) principiannu. Quantu la Riggina cci dissi: — «No, figghia mia, chissu è tò mariti, e pri tantu t'ha fattu chissu, pirchì tu pri lu còcciu di granatu nun ni lu vulisti pri maritu.» Allura anchi lu Re cci dissi tuttu chiddu chi avía fattu. Allura scrissi a lu patri di la Rigginotta; difattu vinni cu la famigghia; si maritaru sullennementi, 'nvitaru tutti l'amici Rignanti, tìnniru tri jorna di fistinu.
      Iddi arristau filici e cuntenti,
      E nïàutri ccà senza nenti.
      Erice(771).
     
      VARIANTI E RISCONTRI
     
      Un'altra versione siciliana è in GONZENBACH, n. 18: Die gedemüthigte Königstochter (La figlia del Re umiliata); una napotana in BASILE, IV, 10: La soperbia casticata. «Lo Re de Bello paiese desprezzato da Cintiella figlia de lo Re de Suocco luongo, da po' che n'appe fatta na gran vennetta, redocennola a male termene, se la piglia pe mogliere.