S. Petru si nni iju, e vinni S. Giuseppi; cci piacíu a lu patri, ma dici comu amicu; comu cumpàri no, pi lu scantu ca lu figghiu cci muría. Vinni S. Giuvanni: la stissa cosa. All'urtimu cu' vinni? vinni la Morti, e cci fici tanti cirimonii. Dici lu patri: — «Ora cci semu; cummari Morti nun si lu porta a mè figghiu, e mè figghiu campa sina a vecchiu;» e cci fici vattïari. Ma ddoppu jorna cummari Morti parrò di purtàrisi lu figghiozzu. Figuràmunni lu patri! Cci rinfacciau la sò finta amicizia, e cci nni dissi 'na letta. La Morti allura ammustrò 'na pocu di lampi addumati; una avía ogghiu assai, 'n'àutra cchiù picca; e a 'n'àutra cci stava finennu; — «e comu chissa, dici la Morti, cc'è lu picciriddu vostru, cumpari, ca vinni l'ura sua, e ogghiu 'un cci nn'è cchiù a la sò lampa.» — E di ddocu nni veni ca la Morti 'un guarda 'n facci a nuddu.
      Palermo.
     
     
      VARIANTI E RISCONTRI
     
      Vedi GONZENBACH, n. 19: Gevatter Tod; WIDTER e WOLF, n. 3: Der Gevatter Tod; KÖHLER, nota 19 alle Sic. Märchen.
      CX.
     
      Li cumpari di S. Giuvanni.
      Cc'era 'na vota un maritu e 'na mugghieri, e avevanu un cumpari San Giuvanni. Lu maritu fu arristatu, e lu purtaru a la Vicaría. Lu cumpari era affizziunatu di la cummari, e cci java a lu spissu a visitalla. 'Na jurnata cci dissi idda: — «Cumpari, lu vulemu jiri a vìdiri a mè maritu?» — «Gnursì, cummari;» dici e si parteru. Pi la strata accattaru un gran muluni, — ca era tempu di muluna, — pi purtallu a lu poviru carzaratu. Semu fatti di carni:... lu cumpari e la cummari affinnèru lu S. Giuvanni.