Et celui, qui s’en vouloit faire prier, faisoit toutesfois semblant que il n’en eüst nul tallent; et non pourtant au derrain dist il au roy que il yroit hebergier avecques lui, pour ce que li roys l’en prioit si doulcement. Ainsi s’en alla avecques lui en telle maniere.»(895)
      [271] «Et quant li mauvais chevaliers fu venu au chastel, la joye fu adonc si grant et si merveilleuse, que c’estoit une merveille de l’ouir et du veoir, des dames et des damoiselles qui encontre lui venoient pour le regarder a merveilles(896).... Et crioient tous a haulte voix: Bien vienge li bon chevalier!...»
      «A tel honneur, comme je vous conte, et a si grant feste fu receü le mauvais chevalier dedans le chastel de Landemore.(897) Et ilz disoient entr’eulx si fermement, que il avoit le tournoiement vaincu. Et tous le venoient veoir a merveilles; et li roys lui faisoit tant d’onneur et tant de courtoisie, comme il povoit; et disoit qu’il estoit appareillés de faire son commandement en toutes guises.(898) Et en telle maniere demoura toute nuit dedens le chastel de Landemore li mauvais, li faillis; et je endroit moy(899) demouray devant le fontainne. Car, puis que je me fu mis illec(900), je m’endormi, ainsi comme je vous ay conté, pour ce que trop estoie travaillé; si dormi tant, que la nuit fu venue, noire et obscure moult estrangement.(901) Quant je me fu esveillés et je vy que la nuit estoit si obscure,.... si dis a moy mesmes que remanoir m’esconvenoit celui soir, voulsisse je ou non voulsisse. Si remés je en telle maniere.