«Et quant li chevalier del pont, qi autre chose ne demandoit fors qe la joste, voit Tristan sor le pont, il se muet d’autre part del pont encontre lui, bruiant come foldre(1750); et s’il vint a l’autre chevalier roidement, orendroit vient plus fort. Il li vient de telle force, qe cil qi les voient lor samble qe li pont doie fondre soz lui.(1751) Et a la verité dire le pont trenbloit tout por la grant roideur qe cheval venoit. Et d’autre part li chevaux, qi fors estoit et sejornez, et avoit le pont a costume a passer, vient corant come rage. Li chevaus de Tristan, qi le pont n’avoit pas a costume, et qi desoz lui sentoit le pont trenbler, ne vient mie si demesureement; car il n’ose, por le pont q’il n’avoit mie apris. Acostumance vaut moult. Li uns chevaux en est acostumez et li autres non.(1752) Le chevalier del pont, qi vient le glaive bessié, s’adroice vers Tristan au plus droit q’il oncques puet. Il ne vet mie refusant. Il sont andui(1753) de grant force et de grant poer, et preudome estoient durement. Et por ce s’entrefierent si roidement q’il oncques poent; et non mie de pou de force, mes de toute la plus grant qe chascuns a.(1754) Fort s’entrefierent ambedui: et de la grant force q’il ont, li dui [468] glaive ronpent, ne il ne se firent autre mal; car li haubert li sont garent après le froissier des lances. Quant il voient qe nulz d’elz n’est abatuz, il s’esforsent plus qe devant por ce qe li uns d’elz ne chiee(1755). Il s’abandonent fierement, et ne vont mie regardant le perill ou il sont andui: ce est ce qu’il ne choient en l’eave.