Et poi ancora, a richiesta dil prefato re, benché li capitoli fusse fato mentione di mandar 3000 fanti, volse se non 1300, et il resto sino al numero di 3000 dimandoe danari, perché lì in reame meglio tal fanti farebe. Et cussì li fo concesso, et mandatoli ducati 10 milia, et decreto che 'l conte Philippo di Rossi con la sua conduta de cavali 400 in reame a' servicii regii etiam vi andasse. In questo zorno de 21, in pregadi fu preso di mandar Alvise Sagudino secretario nostro a tuor il posesso di le tre terre in la Puja, con Zenoa capitano di Rialto e Bortolo Bon et uno altro che al collegio piacerebe, con 100 fanti per uno, acciò vi stesse per custodia in ditte terre; et di far per scurtinio nel prefato consejo di pregadi provedador a Trani con duc. 600 netti al anno per anni do, menando uno doctor per vicario, uno canzelier e uno cavalier. Etiam far provedador a Otranto con ducati 500, et il simile a Brandizo, menando con sé sichome el proveditor di Trane, et de far tre castelani, videlicet uno a Trane, uno a Otranto et uno a Brandizo con duc. 25 al mexe netti per uno, et si dovesse elezerli in dito consejo per eletione; ma, prima che tal rezimenti creasseno, volseno aspettar lettere di Roma con il brieve di la confirmation di capitoli.
     
     
      Exempio de' capitoli tra lo serenissimo signor Ferdinando re di Napoli,
      heriedi et successori nel regno, et lo illustrissimo dominio de Veniexia,
      a dì 21 dil mexe di zenaro M°CCCCLXXXXVI, more veneto 1495.
     
      Primo. - Le parte predite, per li nomi diti di sopra, sono ad insieme convenuti: che el serenissimo principe et serenissima Signoria de Veniexia prefati, mandino immediate nel regno, per ajuto et socorso de la prefata majestà, fino ad homeni d'arme 700. Computando in questo numero li stratioti, se manderano a tre stratioti per dui homeni d'arme.