El marchexe di Mantoa scrisse lettere al re date a dì 21 dezembrio in Mantoa, come mandava messi a Bolzan a tuor fanti alemani, per mandarli in socorso di re Ferando in reame.
     
      A dì 4 zener, che 'l re havia inteso, per lettere di Ferando de 8 dil passato, la morte dil padre re Alfonxo in Sicilia, et come era stà parlato che esso re di romani tolesse Ferando in juramento fraternitatis, con capitoli et obligation.
     
      Item, che domino Erasmo Brascha orator dil ducha de Milan era ivi da la majestà cesarea, venuto per narar li sucessi; dechiarirli le cause l'ha mosso il ducha a far la pace con il re di Franza; dirli in che termene si ritrovava Italia, et procurar la conclusion ultima dil suo venir in Italia.
     
      El dito ducha mandò a donar a esso re uno [21] alozamento di paviglion fornito, sie armadure, sie para di barde dorate, zornede, sopraveste e altri ornamenti militari, a la valuta de duc. 800 vel circha.
     
      Item, chome il re expedite l'orator de Ingiltera a dì 6 zener, et li dette la risposta in scriptis, la qual sarà qui sotto scripta, et li donò una copa d'oro e fiorini 100, et in quella medema sera il re si partì da Norlinga per Augusta.
     
      In Augusta si ritrovava esser el ducha di Baviera cognato di la cesarea majestà, venuto 12 zorni avanti dil re, et Zacaria Contarini doctor orator nostro lo andoe a visitar.
     
      In questi giorni, el legato dil papa episcopo concordiense in Augusta have audientia dal re, et fece una luculente, ornata et artificiosa oratione a dì 10 ditto, et per domino Ludovico Bruno conseglier e secretario dil re li fu risposo, la qual oratione sarà qui sotto scrita, licet longa sia.