Item, essendo il consejo di pregadi suso, da poi leto le letere, fo nonciado esser stà roto e robado in questa terra la percolatia di sora, e averto le porte e tolto dei banchi de fuora duc. 200 et più. In quel tumulto fo licentiado il consejo et rimase su la quarantia criminal, et li avogadori di comun fé dar taja a li ladri L. 2000.
     
      Havendo scripto di sopra la novità seguita a Monopoli et quella intesa meglio, non restarò qui di replicarla. A dì 19, vene letere di Monopoli come era stà discoperto uno tratado che 6 citadini anzuini, composto con francesi e altri anzuini circumstanti, che coresseno su le porte de Monopoli, et mandati fuora li stratioti che ivi erano a custodia, quelli li sereriano le porte di la terra, adeo non poriano ritornar, et volevano occider Nicolò Corner proveditor nostro e levar l'insegne di Franza. Et fato intender questo al proveditor, fo preso uno di complici et li altri fugiteno, et examinato a la tortura confesoe il tuto dil tratato. Item, come quella terra era in arme per la gran carestia di formenti. His intellectis, la Signoria ordinò et comandò a Alvixe Loredan electo proveditor in quel luogo che dovesse immediate partirsi con li provisionati, et li mandò 1000 stera di formento.
     
      A dì 21 ditto, nel consejo di pregadi, fo preso parte di condur 2000 stratioti et 500 zagdari pedoni overo axapi, et mandono a Francesco Nani baylo e capitano a Corfù duc. 16 milia a questo effecto, con lettere a Lepanto, Coron, Modon e Napoli di Romania che quelli rectori dovesseno far la descriptione, et fo ordinati 11 arsilii per mandarli a tuor.