Sumario di lettere dil consolo a Napoli nostro, date a dì 10 fevrer.
     
      El re è pur a Vellino e non è ancor mosso. El principe de Salerno dovea ir a trovar monsignor di Monpensier verso Conza. El signor Prospero Colonna va verso don Cesare. In Leze è molti anzuini. El signor Virginio Orsini verà in Apruzo con pensier di le doane di le piegore. El marchexe di Martina sarà con lui e Carlo di Sanguina, et le pratiche di l'acordo fonno tute fraudolente. El re ha mandà uno secretario in Calavria chiamato Bernardino de Verna, perché li significhi le cosse di quella provintia. El messo dil turcho venuto al re, fo mandà per el sanzacho de la Valona, per haver dil corpo dil fratello ch'è in Gaeta custodito da tre turchi. El re ha mandà ditto messo al principe, el qual messo pertende esser in Gaeta, ma non sarà lassato intrar. El signor Fabricio Colona va in Apruzo. Sarà con più di 200 homeni d'arme fra il conte di Populo et altri. Et queste lettere zonse in questa terra per la via di Roma a dì 18 ditto.
     
     
      Sumario di lettere dil ditto, de dì 11 ditto.
     
      La reina volea licentiar l'armata. El signor Fabricio dia esser in Apruzo, et con le sue zente et quelle dil ducha di Malfi e dil conte di Populo et altri, haverà apresso 300 homeni d'arme. Ogniun me dimanda de questi presidii, per la vehementia dil disiderio hanno. Si confortano vedendo la Signoria haver abrazato questa impresa. La compagnia di Camerino in parte pur con la majestà dil re si trova. Si aspetta le due galee andorono a Messina.
     
      [43]Sumario di lettere dil ditto, de dì 12.