La qual nova piaque molto a' nostri.
     
      In questo zorno, nel consejo di pregadi, fu preso di armar la barza picola di bot. ... e far uno patron di quella per pregadi. Et cussì, a dì 27 fevrer, fo electo Piero Contarini, era stato patrono di nave private molte fiate, el qual messe bancho, et tandem andoe e acompagnò le nave Linforia.
     
      [1496 02 22]A dì 22 ditto, si have lettere di Francesco Capelo cavalier orator in Spagna de 27 zener, advisava come l'alteza dil re seguiva l'impresa, non però facendo altro, per esser inverno, se non le zente feva corarie verso la Franza, et che, d'acordo, Marin Zorzi doctor ripatriava, et questo perché, hessendo manchato il padre, esso Francesco Capelo era stà contento di romagnir. Etiam, come in Aragon una campana sonò da lei medema per spacio di hore 4, et che trenta di principali di la terra havia di questo, manu propria, fato fede a la majestà dil re et regina, la qual cossa era notanda, et che era divulgato ditta campana haver sonato, in questo medemo modo, quando re Alfonso intrò in Napoli, et etiam quando il re don Johanne recuperò la vista, unde si diceva in quelle parte che 'l re di Spagna haria victoria contra francesi; item come li oratori di Franza erano stati, ma non alditi dil re, imo licentiati etc.
     
     
      [1496 02 24]A dì 24 ditto, fo electo nel consejo di pregadi orator in Portogallo a congratularsi al ducha di Viseo di la sua creatione re, et poi ritorni in Spagna et resti orator in loco dil Capello apresso quel re et regina. Et fo electo Jacomo Contarini el doctor da San Felixe, el qual acceptoe, et Francesco Capelo cavalier nel mazor consejo fue creato podestà et capitano in Caodistria, licet assà jovene fusse.