Item, come l'orator di Milan non cessava pregar la majestà regia che 'l vegni in Italia, et li oratori yspani che 'l rompa in Bergogna guerra al re di Franza.
     
      [1496 02 05]A dì 5 detto, el re havia designato quatro, i qualli dovessero andar a la dieta nel paexe de sguizari, e datali la instructione; poi non volse che andasseno, i qualli sono questi: domino Marquardo Breisacher, domino Georgio de Petraplana, domino Hermano de Optingen, et domino Joanne Lanz.
      Item, come uno Zuan Francesco Peschiera, per nome dil marchexe di Mantoa, havia soldato in Trento 200 fanti alemani.
      Item, come el ducha di Milano havia terminato mandar al re di Franza domino Antonio Maria Palavicino per justificare le imputation e calomnie dateli per li ministri, per il non haver lassato armar a Zenoa. Et questo si havea per lettere di Milano.
     
      [1496 02 14]A dì 14 ditto, el conte Ugo de Vertimberg, capitano di la liga de Svevia, è venuto qui a la corte in Augusta. Dice, si la majestà dil re non verà a Franchfort, è dubio li principi, in absentia soa, siano per congregarsi a la dieta.
      Item, che in la dieta celebrata a Eslim sopra le exbursation di le angarie, non è stà facto alcuna diffinitiva conclusion, et che volevano fusse facto election di bone persone in le man di le qual fusseno messo ditto deposito.
      La majestà dil re scrisse una lettera al ducha di Ferara, volesse tegnir con Italia et non voller favorir le cosse francese, et el ducha predito scrisse a domino Herasmo Brascha orator di Milano, che justificasse le cosse sue a la cesarea majestà. El re manda 500 fin 600 fanti al marchexe di Mantoa, capitano domino Pietro Beysoebre Greyf.