Significavit enim vestra illustrissima dominatio non minus de rebus nostris quam nos ipsos angi: nec minori studio quam si pro vestrae reipublicae salute pugnandum esset, contra hostes nostros bella suscepisse decrevisseque copiis auxiliaribus, quas nobis jam destinaverat, maiorem adhuc numerum addere quo nobis expectatae vultum victoriae [65] celerius ostendat, ac praeterea navasse operam, ut a sociis sanctissimi foederis, Urbini dux et Julius Ursinus, nec non cum iis copiarum ductores alii virtute militari ac viribus pollentes conducantur, sponteque et alacri animo propriis stipendio auctorandis, in sumptus faciendi partem velle descendere. Qua re, certissima victoriae spes nostro animo iniecta est, cum sciamus omnino, illos contra quos illustrissima dominatio vestra sumpserit arma, succumbere oportere. Quis enim vestri senatus animi magnitudine, quis prudentiae, quis viribus resistere queat? Quamobrem etsi vos, pro rebus ad nostram salutem spectantibus, minime orari oportere nobis persuademus, oramus tamen: pergite ut coepistis, ac nostram justitiam potentiae vestrae clipeo defendite; hostes prosternite; regni nostri populis nobisque pacem reddite perpetuam de oris, et gloriam pro tam claro facinore sempiternam vobis parituri. Pro quo, vestrae illustrissimae dominationis tantum semper debebimus, ut, omni tempore, beneficii tam insignis piissime memoriam simus intimis pectoris penetralibus habituri. Dat. in Castello nostro Novo, Neapolis quinto martii 1496.
      Rex FERDINANDUS.
     
      A tergo.