Laschari tanto magnanimamente si ha portato, che tuti se ne maraveja. Ferito nel naso, ma non da conto, sì che, gratia Dei, tuti salvi sono con honor di la serenità vostra. Io tengo fra quatro zorni sarano qui. Poi questi, per sua bona sorte, se hanno a caso incontrà in 25 homeni d'arme francesi che andavano a Taranto, se dice, perché quelli de la terra erano in desacordo con quelli dil castello. Or questi homeni di arme fono presi, che non scampò salvo el signor Francesco con uno compagno. Nec alia etc. Monopoli die 6° martii 1496. Questa nova zonze in questa terra a dì 22 marzo.
     
      Per lettere da Syo de 26 zener, se intese haver avisi da Costantinopoli di 9 ditto, esser ivi zonto Camallì turcho corsaro a dì 18 fevrer con le sue fuste, et presentò al Signor do garzoni con 10 schiavi cristiani. Fo visto dal Signor con bona ciera, e averli ordinato più non facesse l'arte del corsaro; item [84] che 'l bilarbei di la Turchia, zenero del Signor turcho, dovea ussir con 10 fuste per andar syndicando le marine di la Turchia; item che Enrichi et Caplici e Caracossam turchi corsari, per paura di dito bilarbei, erano in mar con fuste 6 fora fari, se partino per andar a la Finiticha ovvero a la Finicha, e parte a la Palatia; item, che a dì 26 dito era zonto a la Porta Zorzi Buzardo venuto per nome dil papa, al qual el Signor lo havia visto volentieri et fatoli honor assai.
     
      El re di Franza, in questo tempo, era a Lion, et dete ducati 12 milia di soventione a Zuan Iacomo di Triulzi, acciò atendesse a metersi in hordine per le cosse de Italia; ma, poi che dicto re intese el voler et opinion dil parlamento di Paris, era molto di mallavoja, perché concludevano lhoro opinione esser che soa majestà non si partisse di Franza senza lassar heriedi nel regno.