Era assà pioze asperime et fatigose vie per quelli monti, maxime tra Nocera et Foligno. Or partito di Fuligno, andoe a Spoliti, et a dì 26, zonti a Castelnovo, se partì poi con tempo cativissimo, con neve, pioza e tempesta et vento, et andono ad alozar a Civita Castelana. È da saper che era insieme, sotto il governo di l'orator nostro predito, li 200 stratioti di Treviso, che fo decreto etiam dovesseno andar in reame, per più augumento de li sobsidii dil re. Et in ditto zorno di 26, il sabado, dovendo la excelencia dil marchexe far l'intrata in Roma, Hironimo Zorzi orator predicto nostro li vene contra fuora di Roma zercha mia cinque, licet fusse tutto quel zorno pioza e tempesta. Etiam li vene contra tutte le famiglie di reverendissimi cardinali, et quella dil papa, et tutti li primi romani, et intrò a le 20 hore per la porta dil Populo, dove le dite fameglie aspectavano; passò per Campodefior e andò per Banchi; passò poi il ponte di Sancto Anzolo, [86] et nel castello fo trato assà bote di bombarde in segno di alegreza; andò di longo per Borgo e vene a palazo, dove el pontifice lo aspectava con 8 cardinali, et fo ben visto et ivi alozoe esso signor a spese dil papa, et l'orator Polo Capelo alozò con il nostro orator apresso Campodefior. La matina, a dì 27, fu domenega di le palme, el papa con 24 cardinali andoe in capella, e tutti li ambasadori et ditto marchexe li fo dato luogo a man destra apresso el papa, et lo senator era domino ... de Fuligno etc., a man sinistra. Fo dato le palme, come è il costume, et tanto che durò la messa, che fo hore 4, sempre el signor marchexe stete in piedi tegnando in man la palma dil papa.