Nuove dil mexe di april 1496.
     
      A dì 5 april, se intese li contestabili esser zonti a Pisa in tempo, et li danari mandati per far fanti.
     
      [1496 04 07]A dì 7, fo preso nel consejo di pregadi che Nicolò da Nona, con li soi 100 cavali, di Zara dovesse vegnir di qua et andar a Pisa. Etiam, Sonzin Benzon et Zuan da Ravena, con ballestrieri 50 per uno a cavallo, ivi sono mandati.
     
      [1496 04 08]A dì 8, partì da matina Francesco da la Zuecha secretario nostro per andar a Pisa. Va con 10 famegli et altra tanti cavali. In questo zorno, etiam partì di questa terra et insieme con il secretario nostro a Pisa andoe dom. Zuan Bernardin Agnelo cavalier, stato in questa terra oratore di quella comunità, el qual, a dì 5, fo a conseglio nostro et sentò di sopra li figlioli fo dil principe, et ritornò molto aliegro, vedendo nostri tuor la protetione de' pisani.
     
      Fiorentini dicevano haver aviso da li soi oratori in Franza, videlicet lo episcopo Soderini di Voltera et Ioachin Guasconi, come il re di Franza veria di breve in Italia, et faceva grandissimi preparamenti. A Milano, etiam teneva suo oratore Guido Anton Vespuzi, et Francesco Gualteroti in questi giorni si vene poi in loco suo.
     
      [1496 04 07]A dì 7 ditto, la nave di Zorzi, stata in Fiandra, da poi scorse tante fortune, zonse a salvamento sora porto; ma la nave Trivisana, per fortuna andò sora Pexaro. El conte di Caiazo, in questi giorni fo a Loreto per satisfar a uno suo voto, passò ne l'andar per Bologna.
     
      Zenoesi, per lettere di Zorzi Negro secretario nostro, comenzavano a calzitrar, dolendosi de' luchesi che haveano habuto Pietrasanta la qual lhoro la doveano haver, unde per nostri fo scrito a Milano al ducha non era tempo di far mover tal cosse, ma che si vederia etc.