Spero far cossa di contento di vostra magnificentia. Ex Fogia die 12° aprilis.
     
     
      Littera di dicto, di 16 in Fogia.
     
      Solicita la paga di stratioti, per esser molestato et poter haver bon frutto. Advisa la rota di alemani, la qual la regia majestà ha molto sentita, e tanto più la stima quanto che 'l vede li inimici a l'incontro di fantarie molto superiori. Ha riposto in la illustrissima Signoria tutta la sua speranza, perché vede ben, et cussì fermo spera, da altri che da lei non esser per haver soccorso. Unde, voria a proveder di altratanti fanti, overo fusse molti li danari etc. Mi ha pregato ne scriva a la Signoria, e cussì l'ho facto.
     
     
     
      Littera dil dicto, a dì soprascripto,
      scrita a Bortolo Zorzi provedador di l'armata nostra in Napoli.
     
      Essendo venuto Monpensier in compagnia per voler scuoder la doana di le pecore, unito con el signor Virginio Ursini et li viteleschi, cum forze di [111] 800 homeni d'arme, 500 cavali lezieri et 4000 pedoni, postose ad alozar in campo a dì 14 dil presente, lontano di Nocera loco di questa regia majestà miglia 8, a dì 15 se levò, et adviatose a la volta di Troja, pur loco di essa regia majestà, havendo quella mandato ordine a 700 alemani erano zonti lì, parte veniseno qui et parte andassero a Nocera, quelli si incontrono ne li cavali lizieri de li inimici, con i quali furono a le mano, et combatendo sempre con bon ordine uniti, sempre se andavano retirando per ritornar ne la terra. Et soprazonto uno squadron di homeni d'arme, insieme con li dicti cavali lizieri cargavano adosso de li prefati alemani, i qual virilmente combatendo, al meglio poteno, se reduseno quasi ne le vigne de Troja, donde ussite alcuni cavali per socorerli.