A dì 19 april, nel consejo di pregadi, fo messo parte per i savii di ordeni di metter quatro galie al viazo di Baruto et per in Alexandria et preso. Et la matina fono incantade in Rialto, justa il solito, et pagate per li patroni molto care, et per gran consejo fu facto capitano a Baruto Andrea Baxadona, et in Alexandria Iacomo Badoer di Sebastian cavalier fiol. Et ancora fo messo parte di mandar tre galie in Fiandra; ma, considerando il pericolo, non fu preso vi andasse questo anno. Al viazo de trafego per levante, fo messo 3 galee et electo capetanio Jacomo Cocho. Adoncha tutte queste mude, che prima erano asuete di andar, per queste guerre resteteno, videlicet Fiandra et Aquamorta. Etiam Romania, overo a Costantinopoli, più dicto viazo non usavano.
     
      In questa terra si mormorava che non erano lettere di Francesco Capelo cavalier orator nostro in Franza, et la causa era che, non potendo vegnir per altra via che passar da Barzelona a Zenoa, da alcuni navilii de' francesi li corieri erano intercepti. Fo divulgato di certa rota havia dato spagnuoli apresso Perpignano ad 1500 sguizari dil re di Franza, tamen poi non reusite, et a dì 23 dicto, zonse lettere di 14 fevrer fin de 2 marzo, per le quali se intese come la majestà dil re et regina erano venuti a Tortosa volenterosi di far facti contra francesi, et che havia licentiato li oratori di Franza. Le qual lettere vene per la via di Roma, zoè di Tortosa a Roma, poi in questa terra.
     
      [1496 04 21]A dì 21 dicto, per lettere de l'orator nostro de Milano, se intese come in quel zorno, a dì 19, el ducha li havea dato aviso haver di Torino di la morte di quel ducha Carlo Zuane Amadeo, che era di età di anni 10, el qual morite molto repentinamente, fo judichato da veneno, et che non era altri che, di quel sangue di Sabaudia, ereditar potesse, se non Philippo monsignor di Brexa suo barba, zoè fratelo fo dil bia' Amadio et di madona Bona olim duchessa di Milano, il qual governava la Savoia di là da' monti.