El re ha deliberà doman far ultimo di potentia con tuti li cavali lizieri, e romper essa doana, i qual cavali sono stratioti 1000 e zercha altri cavali 400 lezieri è col re. Li 200 stratioti ozi andono ad Ascole, et questi 200 tra baliestrieri e stratioti dil capitano, el qual inteso el voler dil re montò a cavalo et va a la volta de Foza per far quanto è dito. Li ho dito non voglia metter la persona sua in pericolo, e far l'oficio dil capitano, a comandar e farse obedir, siché a questa hora, 3ª di note, è montato a cavalo.
     
      [1496 04 21]A dì 21 ditto, in Santa Agata, recevuta a dì 5 mazo in questa terra. Inimici, abuto rota da' stratioti, erano conduti a la volta di Monte Santo Anzolo. Scrive come, a dì 20, spazò lettere a la Signoria, et il corier, passando apresso uno castelo de' inimici dito Vicho, era stato preso e tolte le lettere.
     
      [1496 04 22]A dì 22 ditto in Santa Agata, recevute a dì 5 mazo. Inimici, per la fama dil marchexe, tegno se habino fuziti, abandonati primo da li sguizari, i quali, per fame erano andati avanti se levasse el campo da la Incoronada a la volta del Monte Santo Anzolo. Nè altra nova scrive. Si aspecta di bene.
     
      [1496 04 24]A dì 24 ditto in Santa Agata, ricevuta a dì 6 mazo. I nimici vano a la volta di l'Abruzo, o per dubito di novità da quella parte, o per salvarse in lochi forti, o per acompagnar quella parte di doana hanno auta, et acompagnata ritornar. Monsignor de Monpensier, con il gran siniscalcho, s'è dito voler andar [127] a la volta di Gaeta per il contato di Campobasso.