Come a dì 30 april fo con missier Polo Capelo orator dal re, insieme con li stratioti in consulto, dove era el signor marchexe di Mantoa, el signor don Cesare, el signor Prospero Colona, conte Alexandro Sforza, el duca de Melfe, el conte de Merliano, el fiul dil signor di Chamarin, missier Theodoro di Traulzi, missier Andrea de Altavila favoriti di la majestà dil re, dove fo consultato quid fiendum, perché si havia nova li inimici andava a campo a Cojonise, loco tutto aragonese, distante mia 34 de lì, et era loco de importantia, per esser sora el passo di l'Abruzo, fa fochi zercha 500. Fo dicto che si dovesse andar a campo a San Severo, mia 12 de lì, overo ad Ariano verso Benivento, mia 20 de lì, videlicet di Nocera, el qual fa fochi 500 et è de importantia, e San Severo fa fochi 400. Fo tratà etiam di mandar 100 fanti in ajuto de Cojonise, i quali però andavano con paura de' inimici. Et come il re dimandoe l'opinione di ogniuno, et tutti diceva era buono andar ad Ariano, manchava a dir el marchexe, l'orator et esso proveditor. Et lui volse l'orator dicesse prima l'opinion sua, el qual, per esser novo nel paese, non volse. El marchese parlò poche parole, remetendose al juditio dil re e di queli conti e baroni; poi parlò esso Bernardo, dicendo l'opinion sua era di andar con li cavali lezieri a campo a San Severo, perché li inimici cessaria di Cojonise e vegneriano a socorso di San Severo. Per esser da Cojonise a San Severo mia 24, et inimici non potevano [168] venir che lhoro non il sapesse, unde potevano, dubitando poi, ritrarse indrio nostri.