De questo se dubita: tutti li altri non haverano mal di pericolo. Da poi, sopravenute con difficoltà le nostre artegliarie, et facto intender a li homeni se volesseno render, cominzono cridar Franza, Franza. Piantate duo bombardelle et alcuni passavolanti, e da poi messi li schiopetieri et balestrieri a le poste, li fanti nostri se presentorono a le mura animosamente, benché li saxi volaseno da le mura, et quelli di la terra lavorassino cum artegliarie. Apuzate le scalle, et ascendendo li nostri, più volte furono rebatuti dall'altra parte; pur li fanti nostri atendevano a romper le mura. Ultimo loco, lo illustrissimo signor marchexe, el qual astava et dava animo a tuti exhortandoli a la victoria, fece desmontar duo squadre de li suo' homini d'arme et conduseli a le mura, et cussì cominzorono ancor lhor a scender con le scalle. Combatendossi la terra da tre bande, et defendandossi li homeni virilmente, tandem se obtenero le mura, et intrati dentro non fu perdonato né a età né a sexo. Deposte le arme per quelli de la terra, fu facto uno bando che le done et li homeni fusseno salvi della vita. Tuta la terra fu sachizata. Magnifico patron, io referisco el vero perché vedo ogni cosa con l'ochio. Lo illustrissimo capitano ha facto da savio et da animoso. Le sue zente d'arme da viril homeni. Non dirò niente de li nostri contestabili et provisionati, perché voglio che altri li laudano; ma pur non posso tacer che io li vidi apresentar cussì animosamente quanto vedesse mai altri soldati, o che 'l fusse per la virtù lhoro, o che la presentia dil [172] capitano li desse animo.