Et quello tutto eri fue bombardato con 2 canoni, 7 falconeti, et per fino a hore 20 havevano butato zoso una tore et una alla di muro. Tamen, era de dentro alcuni ripari non però sufizienti, i qualli se tenivano forti per esser intrati la note avanti 200 vasconi benissimo in hordine. Visto li fanti forestieri ch'erano dentro non poter resister, comenzono a dimandar pati, e fue a parlamento con il conte di Sarno domino Hironimo de Totavila, e dimandò acordo, le lhoro persone salve e le robe e li villani e la terra a sacho. Per esser l'hora tarda, e poi perché inimici alozati lontano de nui mia 6, havendo hauto certeza che li lhoro cariazi havevano mandato dentro de Marcone per esser expediti per la matina per vegnir a la volta et soccorer Frangietto, fu deliberato, e bene, di acetar ogni partito per talli respeti. Cussì, stando sopra li parlamenti e 'l sole andato a monte, per manco scandolo non hano voluto fin che la note; meteno fuori 4 li primi capetanii de li fanti forestieri et 50 villani de li primi, e posto zercha 200 fanti de la regia majestà, fazendo vardar le mure intorno de li alemani tuta quella notte. La matina, che fue ozi, si [213] messe a sacho zeneralmente, facendo gran crudelità in tuor femine e puti, e quelli venduti uno con l'altro. E poi fo cridato arme, arme, perché se haveva havuto nova li nimici erano montati a cavalo et veniva a la volta nostra. Non podendo trar le zente de la terra, fu deliberato metter focho in ditta terra, e subito posto focho intorno le caxe, non obstante el foco, li indiavolati homini salivano in le case e pur recuperaveno le robe.