E chi non fesse cussì, questo regno si convegneria aquistar a palmo a palmo. La rocha è fortissima, et intrati nostri dentro la terra, fo tirato a la rocha meno di colpi 6 di uno canone che domandono di esser a parlamento. E voriano zorni 2 di tempo, e, non venendo socorso, si renderiano. Il re non ha voluto. È stà drezato le artegliarie e per la note non se ha fato altro. Diman, avanti zorno, se bombarderà. Si va aquistando gran reputation, et per questo metter a sacho, li alemani si hano refreschado, e cussì la fanteria, ch'è stato molto a proposito. Questa sera, si ha per uno presone dil campo inimico, come ozi è partido el principe di Salerno di lhoro campo, con tre squadre, et esser andato a Salerno, et che monsignor di Monpensier, con le altre zente, doveva andar a Venosa. Tegno vadino temporizando fino che vegnino li pressidii da mar. Nui li andaremo a campizar dove serano. Ozi bombardando questa terra, di do canoni se ne era roto l'uno. Ne ha mandato la majestà regia a tuor do a uno castelo qui vicino. De' nostri, ogi è stati morti 2, et pochissimi feriti. In questa hora, ch'è 4 di note, sentimo bombardar la rocha. Tegno fino da matina si harà fatto optima operation.
     
      Tandem poi la se ebbe, come per lettere de 18 se intese.
     
     
      Altre nuove in ditto mexe.
     
      È da saper, chome per li fuzidi dil campo nemico et venuti nel regio si intese, che madama de [219] Biau duchessa di Barbon et sorela dil roy, havia scrito a monsignor di Monpensier che 'l deba conzar le cosse sue al mejo che 'l puol, perché, per questo anno, el roy non pò venir in Italia, e che, non se fidando de italiani, si debi redur in qualche loco sicuro per custodia di la sua persona, per fina che altra provision si farà.