Et inteso questo per nostri, fo scrito a Milano dovesse levar Lucio Malvezo de ditta impresa, per esser etc.
     
      Da Zenoa, vene lettere in questo zorno di 22 et 24, chome era zonto Jacomo Contarini dotor andava orator in Portogallo, et al re e regina di Spagna restar residente.
     
      Item, che haveano avisi di Franza come la duchessa di Barbon havia represo el cardinal Samallò, che per farse cardinal havia menado el re in Italia, et hora per esser papa lo voleva far ritornar.
     
      Item, che le nave zenoese 4 et le 6 barze erano levate dil porto et andate a la volta di Provenza; le nostre 6 galie erano a Telamon per dar i formenti portavano a Pisa.
     
      Item, come il secretario nostro havia fato li fanti a conto di la Signoria nostra, per dubito di la parte Fregosa.
     
      Da Bologna, lettere di 24 che il magnifico Johanne non cavalchava per non haver abuto danari da Milano; che fiorentini tra lhoro erano divisi; che havia aviso come yspani havia dato tajata grande a' francesi.
     
      Di l'Apruzo da Teramo, lettere di 25 di Jacomazo da Veniexia condutier nostro, come el ducha [224] di Urbin era zonto lì ben in hordine, e che li convenia expugnar Teramo, perché non si volevano render, e sperava de averlo.
     
      Da Roma, lettere di Nicolò Michiel dotor e cavalier orator nostro, di 26, come el pontifice mandava uno brieve a Bologna al magnifico Johane Bentivoi; che 'l papa era a Belveder ocioso, et che, quanto al cardinalato dil fratello dil marchexe di Mantoa, li havia dato tre partidi: primo, le bolle post obitum pontificis; secondo, li faria promotion; terzo, finita la guerra li daria el capello.