Et questa tal nuova intesa in questa terra, tutti universalmente dimostrono haver pocho contento, et mormoravano molto, dicendo che 'l re li havevano tutti et che non podevano scapolar, etc. Tamen, judicio meo fece benissimo, perché saria stato qualche zorno, et forsi venendo a le mano, havendo a far con desperati, licet più numero fusse, la vittoria sarebe stata dubiosa. Pur fece ditto acordo senza comunicar né con il papa, né con la Signoria nostra, né etiam col ducha de Milano, et più presto volse in termene di 30 zorni haver el suo regno pacifico, che haver expugnado, e star con l'exercito et spexa, e doverse fidar de' militi soi, maxime cognoscendo haver pochi regnicoli che a la caxa Aragona volesse bene. La qual ferma sigilation et conclusion vene in questa terra a dì 30 dito, per lettere di 23 di Polo Capelo orator nostro, et scurtono il termine fino a li 10 di avosto che francesi dovesseno haversi comenzato a redurse a la marina quelli volevano andar per mare, e li altri andar via per terra acompagnati, da loco a loco, fin di là da' monti, né mai li sei siano lassati se prima non si habi noticia che siano zonti in Provenza, over di là da' monti; item, che le vituarie se li debia dar zorno per zorno, et acompagnata fino in la terra, e debesse tuor dove a esso vorà; item, che quelli di l'Atella non possi ussir fuori de notte, né possino di zorno ussir più di 40 per volta; item che solum tre lochi, over terre, zoè Gaeta, Taranto et Venosa, che era soto monsignor di Beuchari, tutto il resto ditto Monpensier promise restituirli, e se non vorano, el contenta che esso re non li havesse alcuna remission, ma li mandi tutti per il fil di la spada ut scribitur in capitulis.