[1496 08 03]A dì 3 ditto, noto come era in fontego di la farina a Rialto et a San Marco, solum stera 2000 di farine, in modo tutti i formenti menudi valevano L. 5 el ster, et in tre zorni montono a uno ducato el ster, e la farina L. 8. E sul marchà di Mestre valeva L. 7 s. 8 in 10, per la qual cossa li provedadori di le biave fono molto improperati, i qualli era Piero Foscarini, Ambruoxo Contarini, et Zacharia Dolfin. Et tandem feno valide provixion, et subito vene farine, adeo la terra non patì di molta carestia. Licet non fusse molto bono racolto, pur ditti proveditori feno assà mercadi con mercadanti di formenti, et fino di Alexandria, che mai più ne vene formenti. Se ne aspectava et vene stera 5 in 6 milia.
     
      [1496 08 05]A dì 5, da matina, vene lettere di Pixa come Nicolò da Nona, capo de' 125 stratioti, era morto da una ferita abuta ne li zorni passati ne le coste da un passador, in la ultima scaramuza che 'l feze con 60 di soi cavali contra 100 ballestieri a cavallo et 200 fanti de li nemici, de li quali el ne amazò 8 et ne prese 7, el resto fugite, et lui, con do altri stratioti, forono feriti e morti tre cavali, et li compagni varite et esso Nicolò morite. La qual morte a tutti dolse, per la optima fama e strenuità havea.
     
      Item, che le zente duchesche rechieseno al nostro proveditor Zustignan Morexini ducati 200, el qual recusò, excusandosi non li haver. Unde, fuziteno di ditte zente 400 fanti, et è da saper come per avanti Lucio Malvezzo, capitano di le ditte zente de Milano, dimandoe a esso proveditor ducati 400 per imprestedo et quello li dete, unde nostri non l'have molto a ben, vedendo che si dava danari et nulla di bono si faceva.