Ancora, è da saper come li 50 homeni d'arme et 600 sguizari i qualli ussiteno di l'Atella e vene in campo dil re, Monpensier mandò a dir al re come volleva che prima el fusse acompagnato justa i capitoli con le zente sue a Castelamar, et, poi che fusse montato in nave, soa majestà conducha quelli li par et che volevano romagnir in Italia, perché, fino non era partito, el voleva questi tal fosseno obligati a lui. Et di questo el re lo compiasete, et poi rimaseno a suo soldo. Noto, come la Signoria nostra fo requisida da li oratori di Spagna e di Milan, che volesse consentir de invader Monpensier ussito che 'l fusse di l'Atella, atento che Ferandino li havia fatto salvo conduto sollo fino in nave, et che, per mar, o l'armada era a Zenoa, o quella era a Napoli e in Calavria poteva de jure esser combatuto. Unde, fo fato do pregadi sopra questo, et fono cinque opinion. Tandem, fu preso di risponder a Milan che questa Signoria mai havia rotto fede ad alguno, né hora volleva romper, et che li altri collegadi facesse come li piaceva.
     
      [264][1496 08 06]
      A dì 6, vene lettere da Milan, come si havia dal re di romani, el qual havia scrito che, fino 15 zorni, seria di qua da' monti con zente assai, tra i qual molti sguizari. Et che ivi a Milan se faceva gran preparatamenti de conzieri, et che 'l ducha seguiva in acumular danari, come havia fatto da uno anno in qua, et meteva gran angarie a li populi di le sue terre, dicendo li bisognava danari per questa venuta di Maximiliano in Italia. Per la qual cossa, in questa terra non si steva senza fastidio di le cosse che ditto ducha faceva, el qual era stato causa de tirar Maximiliano in Italia.