Et el ducha de Milan preditto exortava nostri a mandarli li danari promessi a sua majestà. Adeo venitiani, zercha queste rechieste, erano in gran consulti quid fiendum, et tandem fo scrito che Francesco Foscari orator nostro a sua cesarea majestà dovesse disuader la venuta sua pro nunc in Italia, perché el vegneria con incargo di sua majestà, la qual vien reservada a gran bisogni contro francesi. Tamen fo tardi, et zà era de qui da' monti venuto, et non era possibele farlo ritornar in Alemagna. Et se avanti nostri havesse scrito una minima parola a ditto nostro orator che disuadesse di questa venuta soa majestà, forsi, imo certo, mai non saria venuto, perché ditto re dimostrava come doveva far gran cavedal di venitiani più che de niun di altri.
     
      Domente queste cose si fano, el re di Franza, per lettere di 28 lujo da Lion, se intese era stato a Paris e tornava a Tors da la moglie; poi doveva vegnir a Lion per mandar zente in Italia. Tamen, non vene per questo anno de qui.
     
      Vedendo venitiani il star di Hironimo Donado doctor orator nostro a Lucha era senza far fructo, et che luchesi erano duri in voller tegnir Pietrasancta, dicendo che de jure la potevano tegnir, et più presto volevano dar qualche mier de ducati a' zenoesi per tasentarli, che restituirla per niun modo: unde, [268] stato ditto orator ivi a Luca zercha mexi 3, per il consejo di pregadi, a dì 11 avosto li fo dato licentia che 'l dovesse ritornar a la sua pretura di Brexa. In loco dil qual a Brexa fue electo Zorzi Corner el cavalier, era cao dil consejo di X et fratello di la illustrissima rezina de Cypri, el qual acceptoe et andò, come più di sotto, non senza bon proposito, sarà scripto.