È da saper come a Napoli, in questo tempo, over a Cajeta con el preffato capitano zeneral nostro, si ritrovava questi soracomiti patricii nostri: Cabriel Barbarigo, Marin Dandolo, Francesco Valier, Antonio Loredan, Agustin Pasqualigo posto su la galia che era di Piero Loredan.
     
      Item, questi altri: Nicolò Paladin cavalier lisignan, el qual amalato lassoe suo fiol Polo, et lui a Lesna a varir di la egritudine andoe. Item la galia ystriana, zibinzana vechia, et zibinzana nuova, zaratina, corfiota, et un'altra; in tutto galie ...
     
     
      Sumario di lettere di Famagosta, 1496, avosto.
     
      Lettere di Damasco di 22 di lujo, avisa la morte dil soldam a dì 2 ditto, in loco dil qual sublevato soldam el fiol, con favor di Campson Campsonmei, el qual è stà fato armirajo grando. À dispensà ducati 80 milia. Si dice non durerà molti zorni, per esser fiol di la zente. Si dice sarà soldam dito Campsom. El qual à mandato in exilio e disperso tutti i armiraggii e gran maistri, e à sulevato altri di la soa parte. El diodar grando dil soldam morto, era fuzito in paexe de Nobolus, dove era con 300 cavali. Si diceva dovea andar verso il Cayro. Temurs, era armirajo, era stà mandà in cadene nil castel di Alexandria. Isbecha el Camar era stà fato miracur. Campsom El Fi era stà fato diodar grande. È stà poste caxe a sacho fo dil diodar. El signor di Damasco è intrato in castelo di volontà dil castelam, e posto le man sopra il deposito dil soldam, era lì in castello, si dice ducati 400 milia.
     
      Item, sarà novità nel paexe.