El signor di Baruto era stà morto con uno altro so parente bevando da [289] uno suo zerman. Tamen, niun garbujo ancor è stà fato a la nation. El signor de Alepo stava serato senza ubidientia; la mazor parte di soi schiavi è stà tajà a pezi. El signor di Tripoli dubitava molto, perché Lazebo si havea sublevato contra de lui. A Tripoli era seguito gran garbujo a la nation nostra, per una fusta di Rodi che fé alcuni danni. Unde el Signor mandò per ser Alberto Contarini fator de lì, volendo la nation pagasse tal danni. Rispose non doveva, e mostrò uno comandamento dil soldam che assolve la nation di tal danni. El signor Ezilebo fece baterlo e manzoli ducati 1000. E ser Alberto spazò a Damasco al consolo, e la nation deliberò a batalar la marina di Tripoli; ma per non far danno a le galie, deliberò sorastar.
     
      Item, è specie assai: colli 6000.
     
      Lettera di 26 novembrio di Damasco.
     
      Le cose dil soldam passano quiete. À fato morir molti schiavi per sospeto e molti ne mandò liberi a tal a Damasco, homini di bon aspeto. Campsom Campsomì è al tutto al Chajaro. Zà più dì, al Cajero fo un pocho di garbujo: si pacificò.
     
     
      Per una altra lettera.
     
      El diodar dil soldam morto stete oculto, a 1.° octobrio andò a Gazera, dove unito con quel Signor, stete lì per tutto il mexe. Feze mal assai in caravane che ogni zorno passavano. Poi, ai primi di questo, sentendo il soldam li mandava schiavi per averlo in le man, si partì da Gazara con quel Signor e zercha cavali 400, e vene a la volta di Tripoli. El Signor di quella terra li mandò contra cavali 500 per ofenderlo, il qual andò fino a Baruto, né si potè incontrar in lui e tornò adietro.