Comenzò a hore 20; durò la note, e slavazò la brigata. Pasato setembrio, non è possibil star qui con galie. Le nave e barze è mal conditionate de homeni, et messer Calcenando Rechesens capitano spagniul à mandà pur mo' a Napoli a tuor 600 homeni con danari. Si venisse il socorso francese da mar etc., si saria in pericolo. Missier ha scrito il tutto al re. A Gaeta, è 11 nave nimiche. Si aspetta la Palavicina, 3 altre nave e 3 galioni, et 18 galie sarà poi 19; et 11 val 30 bone velle apresso la terra dei inimici. Noto come, a Napoli, el re havia 14 nostre galie avanti zonzesse il zeneral ivi, et era in la soa comission uno capitolo che, zonto a Napoli, el si dovesse levar, acciò non se inmarcissa quella armada, e andar dovesse dove la majestà regia li comandava. È da saper che ditto capitano zeneral nostro, concesse le 2 galie al re per condur Monpensier con li altri in Provenza, el qual dite queste: la Corfiuota soracomito Nicolò di Goti, e la Catarina. Et galioti, inteso che dovevano andar in Franza, si levono a rumor e non volseno andar etc.
     
      Item come, per lettere di Napoli, el marchexe di [294] Mantoa era alquanto indisposto; era ivi zonto, et il signor di Pexaro et don Fedrico etiam, zonto el qual si preparava per Cajeta.
     
      [1496 09 06]A dì 6, per lettere di reame di Polo Capelo cavalier orator de dì 28 avosto, come il marchexe di Mantoa capitano nostro era grievemente amallato a Fondi, et che l'era andato ditto orator a visitarlo ivi, mia 20 da Napoli; e questa è la causa che a Fondi si ritrovava, perché li era stà ditto da alcuni astrologi che 'l moriria in Napoli.