Item, che il signor Virginio Orsino con suo fiol Zuan Zordam era dal re stà retenuto, et la causa non se intendeva cussì pubblice, ma di soto sarà scrita. Et che francesi erano imbarchati bona parte e a la zornata se imbarchavano lì a Castelamar sopra 4 nave, et ne erano ivi morti de' ditti francesi e sguizari per l'aere e senestri da 1200 in suso, et de' stratioti amallati ne erano n.° 200.
     
      [1496 09 13]Adì 13, vene lettere di Domenego Dolfin e Zustignam Morexini proveditori a Pisa et Francesco da la Zuecha secretario, date a dì 9, come stratioti, essendo scorsi a certi castelli per far butini, trovò scontro de inimici i qualli erano stà avisati, in modo che se azufono e da una parte e l'altra seguite gran tajata, e nostri tornono con preda di 400 some di formento, et che Zuam Paolo di Manfron capo di le zente nostre era stà ferito da uno vereton in uno galon. Sono stati etiam insieme con stratioti i cavali lizieri; et è da saper che quelli tre lochi de' fiorentini che nostri preseno el zorno avanti, videlicet [303] Morona, Terazuola e Sojana, situadi su coline e su passi, è lochi di non pocha importantia, adeo nostri, volendo, potrano corer per quella via quasi fino a Fiorenza.
     
      Noto come, per il consejo di X, fo scrito a Domenego Malipiero proveditor di l'armada, et a li proveditori nostri in campo in Toschana, che subito dovesseno mandar in ferri et con bona custodia, facendo el tutto di averlo in le mane, in questa terra, Zuan Jacomo Bon fo di ser Alexandro, el qual se ritrovava soracomito mandato per la Signoria nostra su la galia fo Bemba, et tunc era a Porto Pisano su la sua galia.