Questo ho voluto scriver, licet al preposito non sia.
     
      A dì 13 ditto, nel consejo di pregadi, fu electo capitano di le nave armade Andrea Loredan stato alias capitano di le nave, et fu preso di armar la barza nova granda de comun. El qual capetanio acceptoe la matina, ma non parse poi al senato di [304] armarlo fino al tempo nuovo, et perhò sorasteteno di armar. Et inteso che l'armata francese havea tolto la volta di Provenza, etiam scrisseno al capitano zeneral nostro da mar che non si dovesse muover, ma ivi star. Et Andrea Loredan, acciò havesse information di le cose di la terra fino a tempo nuovo che lo volevano armar, a dì 19 dezembrio fo preso parte in pregadi che el ditto entrar potesse nel ditto consejo, non metendo ballota.
     
      Li oratori nostri Antonio Grimani procuratore et Marco Antonio Morexini cavalier, partiti di Veniexia a dì 2 di septembre come ho ditto, andono a Padoa, poi a Vizenza, Verona, Brexa et Crema, et ivi steteno aspectar la sua comissione, la qual zonse a dì ditto. Et poi andono a Lodi terra dil ducha de Milano, mia 10 da Crema, demum introno a Milano a dì 14 ditto, molto honorati, perché el ducha li mandò contra da Vegevene el conte de Malz fo fiol natural dil ducha Galeazo suo fratello, videlicet suo nepote, et apresso lui molto favorito. Et cussì come el signor Hermes è bassato, cussì questo è in gran reputatione. L'altro fu el signor Gilberto da Carpi. Et questi con molti cavali li veneno contra, e a la porta de Milano era l'arzivescovo con la croce avanti, domino Guido Antonio Rizimboldo, con Bortolo Calcho ducal secretario et locotenente in Milano, con molti altri dil consejo del ducha preditto, et etiam Marco Dandolo dotor et chavalier orator nostro.