El signor Galeazo di Sanseverino, capitano zeneral dil ducha et suo zenero, era lì a Vegievene con la febre quartana, né in cosse di stato se impazava, et solum atendeva a guarir etc. Etiam el marchexe Hermes, fo fratello dil ducha morto, tamen con pocha reputatione, el qual atendeva a darsi piacer, et non solum il ducha lo operava, ma non li dava la provision soa.
     
      Domente queste cosse si fano, fiorentini elexeno do ambasadori al dito re di romani, videlicet lo episcopo di Arezo et Francisco Pipo over Pepi. Et a dì 15 partiteno de Fiorenza, et con bella compagnia veneno a Tortona a dì 25 di settembre, contra di li qual andoe el ducha et oratori; ma li nostri non li andono, imo insieme non si parlono, né anche si salutono. Et poi andono a Zenoa dal re, come al loco suo sarà scrito.
     
      El re di Franza mandoe uno araldo con una letera al re di romani, el qual zonse a dì 23 ditto in Tortona, per la qual advisava come, a dì 8 del mexe, a Tors la regina sua moglie havia partorito el signor Dolfin. Et il re preditto li rispose alegrandosi, etc. et expedito ditto araldo da sé.
     
      El re di romani elexe oratori a la Signoria nostra lo episcopo di Trento et lo preposito di Brexenon, a li qual scrisse che dovesseno vegnir in questa terra, i quali erano in Alemagna. Et in Savoia mandoe domino Gualtier de Stadion, et a Monferà domino Ludovico Brun per exortarli che volesseno star in la devution di la cesarea majestà, et volesseno esser boni italiani et non aderirsi a' voleri gallici. I qualli andono, et a Zenoa ritornono dove era il re preditto di romani.