Volessemo prestar al re ducati 4000 e che 'l mandasse i oglii in Alexandria per suo conto, fazandone cauti del cavedal e de' noli. Fossemo menati in molto tempo con questa praticha, adeo che fossemo licentiadi. De ché se partissimo come desperati, e andassemo ai Zerbi, per veder se de lì podevemo far qualche nolizato. Etiam se havaria cavato ducati 1000 ai Zerbi; ma la nave zenoese è stata la nostra ruina e a Tunis e per tutta la Barbaria, de ché, mai seria stà galie del trafego havesse abuto el più bel partido de le nostre, se non fosse stà la nave de' zenoesi. Mori non saria stà su la sua opinion, quando i non havesse habuto la nave grossa gienoesa di botte 3000. Or noi pratichassemo al Zerbi, et havevimo quasi nolizato la fortuna nostra promisse, che subito la nave ditta ne fo a le spale, et subito dismontati in terra, con comandamento del re che non se cargasse su le galie per niun modo. E poi mori, che erano su quella nave, dismontorono in terra, in modo che fo disconzà i nostri disegni. Et partissemo da Zerbi senza haver un pizolo de noli. Andassemo a Tripoli, dove ne fo mostrà quatro comandamenti del re che non fosseno cargate queste galie, né pur ne fo dato de l'aqua, siché in ogni logo habiamo experimentado la nostra fortuna e niente ne ha zovato. Pacientia de quello piaze a Dio. Et, sopra merchado, la nave de Priamo Contarini ha [328] compito de roborarne la carta, che ha cargato oglii de judei e mori et quello ge ha parso. Spero in Dio e in la justicia che saremo sovenuti.