Le altre se strense in terra, in modo che non potea fuzir, et forzo fo investir su zerti schagni che son su quella ixola de Zerbi. E noi presti mandassemo le nostre barche e copani e montassemo su la nave. El capitano de quella nave, nome Nicolò Bonfio, montò su la sua barcha e fuzite a la volta de terra, unde, le nostre barche subito zonte a nave, montò suso ditta nave, su la qual era homeni trenta. Volea far diffesa; non li bastò l'animo. Fu messo a sacho ogni cossa; non era cossa da conto perché el bon, el mior fu portà via con el capitano de la nave. Mancha artellarie assai la nave, in modo che tutto fo messo a sacho. Su la nave era homeni 106, i quali tutti son mal capitadi. 30 ne havessemo nui con la nave, lo resto fuzite in terra de mori i qual fono tenuti per schiavi. Molti se anegorono per fuzer. Mori ne à pichadi assai; in una matina 16; per modo che tutti sono andati in mal hora. [329] Avisandoti che 'l corsaro che fuzite con la barcha haveva una fusta che li andava drieto, e subito che la vete che la nave fu presa, e che la barcha de la nave fuziva, se ne andò a la volta de la barcha e alevò el suo capitano con tutti quelli homeni che fuzite. Ma non potè andar via la fusta, respeto che era gran fortuna de mar e de vento. Li fu forzo andar drieto una ponta, et mori per terra perseguitava la fusta, donde feno tanto che fezeno desmontar ditto capitano, e desmontado che 'l fu, nui el savessemo, operassemo tanto con mori che 'l facessemo apichar. Avisandoti che l'hera homo di sorta che fazea tremar tutto el mar de Lion, perché avea 3 barze in conserva, e che quando li dessemo l'incalzo a lui, le altre fuzite.