Le qual galie erano queste: quella dil proveditor, la Bona di Zuam Jacomo, ma li manchava il soracomito et il provedador messe Lorenzo Loredan a caso ivi venuto vice soracomito et per il consejo di pregadi fu confermato; la terza, ser Marin Signolo, la quarta ser Stamati Bragadin soracomiti cretesi, la Spalatina, soracomito Jacomo di Nal posto in loco dil fratello che soracomito morite, et la sexta Zaratina. A Portopisano si trovava Cresole corfuoto et Zedolini zaratin vechio. Etiam volseno fusse nel numero di ditta nostra armata 2 galie sotil zenoese armate per forza dil gobo, zoè capitano domino Bricio Zustignan, le qual vidi, erano prestissime de remi. Et per far la ditta armada, bisognava ducati 6000 a pagar per terzo, Spagna, Venetia et Milan, et cussì il re fusse concluso di far senza dar altri avisi, perché la celerità importava, et il proveditor di l'armada, Francesco Foscari orator et Zorzi Negro secretario si tolseno tal libertà di asentir a questo, perché cussì il re volse. Et in otto zorni fo fato la dita armata, et il re montò suso, come dirò [337] di soto. Et a dì 27 septembrio, esso re intrò honorifice, more imperatorio in Zenoa, con bel hordine, qual nel mio itinerario è scripto; arivò a hore 24, dismontò al domo a S. Lorenzo, et in questa sera ritornò ad alozar fuora. Et a dì 28 da sera iterum, senza altra pompa, intrò in la terra ad habitar in una caxa dil cardinal San Piero in Vincula, bellissima, et volse veder il cadin di smaraldo chiamato da' zenoesi Sagradal, cossa bellissima et di gran valluta, qual io vidi.