Questi dimandono siano exercitati acciò sia cognosuta la valorosità lhoro et secondo sue opere siano premiati, né si curono di provarsi a la nobiltà dil mazor consejo. Questi fono cognossuti da sue amede sorele di sua madre, et hanno uno altro fratello menor che, insieme con lhoro, fu preso a Negroponte et latava, el qual è turcho, et per haver in la Natolia bona condition, non si à curato di levarsi, stando bene a soldo di quelli signori. Or da poi, a dì 20 dezembrio, nel [380] consejo di pregadi, li fo dato di provisione a li diti ducati 12 al mexe per uno, et la tansa per 2 cavalli, et cussì restono.
     
      Le galie veramente di Alexandria, capitano Jacomo Badoer, zonse in Istria, et 2 dil trafego, capitano Jacomo Cocho, assà ben carge. Et a la nave di Hironimo Contarini avanzò rata colli 80. Item, che ritornava in driedo, de contadi, ducati 50 milia. Restava in Alexandria ojo botte 1000, rami cantera 10 milia, savoni miera 200 milia, casse di coralli numero 35 e altre merze, in tutto per ducati 150 milia.
     
      Item, che il fiol dil soldam regnava, et col favor di l'armirajo che havia sublevato chiamato Campson Campsomì, che stava nel farion di Alexandria, si manteniva nel soldanato. El qual armirajo tandem, era judicio et opinion in quelle parte che saria quello che li toria el dominio, come suol intravegnir etc. Et ditte galie tutte introno a dì 22 ditto in questa terra, excepto la galia di Alvixe Arimondo patron, la qual rimase di fuora per non esser stà liberata, et sopravene fortuna adeo scorse gran pericolo; pur tandem Idio volse che la intrò a salvamento.