Et l'orator di Napoli vene molto di malavoja zoso per la scala. Ancora fo chiamati li oratori tarentini, et per el principe li fo exposto la deliberation preditta, sotto parole che dimostrava nostri el volleva tuor; ma non si lassono ben intender, et li ordinò non dovesse dir a niun tal risposta. I quali poi, consegnatosi insieme, ritornono in collegio a dir a la Signora(20) che volevano uno libero dir sì o no, et che senza mandar alcuno a Taranto, haveano lhoro libertà di dar le forteze libere in man di la Signoria. La qual rechiesta fo poi referita in pregadi.
     
      In questo zorno, a dì 21 novembrio, fu desmesso gran consejo per la venuta dil marchexe di Mantoa, el qual vene per Po. Et li fo mandato contra fino a Chioza li soi compagni Sbragazai, dove Nicolò Salamon li fece una saputa oratione a Chioza. Poi a Malamocho etiam fo mandati alcuni zenthilomeni, et hessendo la matina mandato per causa di le aque el Bucintoro vuodo al Corpus Domini, dove da poi disnar la Signoria, con el principe et questi oratori, do dil re di romani, Spagna, Napoli, Milan, Ferrara, Rimano, Pisa et il baron Tuciano hungaro et altri assà patricii, veneno in li piati, et [384] alquanto in chiesia dimorono. Poi, zonto el prefatto signor marchexe insieme con Stephano Contarini podestà di Chioza et li altri patricii nostri li fo mandati incontra, a la porta di la chiesia si abrazono con el principe nostro. Era vestito di negro, sì per il corotto dil barba signor Zuam Francesco, come dil re Ferando; vestito a la curta a la castigliana, con una cavìa postiza negra, et havia cativa ciera per la egritudine abuta.