Era in sua compagnia suo cuxino domino Phebus de Gonzaga fo fiul dil signor Zuam Francesco et stato con lui in reame, vestito con uno mantel longo da coroto, el signor conte Philippo di Rossi, Jacomazo da Veniexia, Piero Zentil, et altri homeni d'arme tutti stati in reame in servicii di la Signoria nostra. Et montato in Bucintoro, fo menato per il canal grande fino a la sua caxa a San Trovaxo, zoè quella fo dil signor Ruberto, et li fo per la Signoria nostra fate le spexe, et fo fato, per honorarlo, cinque paraschelmi con bandiere per canal. Et il luni, a dì 22, fo la matina seguente, vene a la Signoria, exponendo quanto havia fatto in reame, et di la fede havia sempre abuta et haverà a questo illustrissimo stato, dicendo non havia cavali ni arme ni zente, et che pocho havia mancato non havesse lassato la vita. Et tochò come li avanzava ducati 7000, pregando la Signoria volesse fargli dar etc. Et in quella matina, intrando con campanò le galie di Alexandria e dil trafego, venuto zoso di l'audientia, volse andar a montar suso ditte galie, e vegnir dentro a vella per provar et veder più cosse. Et poi, la sera, volse andar a cha' Soranzo a le noze, perhò che, in questi zorni, fu fato uno bellissimo per di noze di Zuam Soranzo, fo di ser Vetor fo dal banco, in la fia di domino Georgio Corner cavalier fratello di la raina de Cypri, le qual noze di feste et pasti fonno sontuosissime. Ideo, esso marchexe una sera vi volse andar. Et poi che stete ditto marchexe zorni 6 in questa terra, partì et andò per terra per la via di Padoa a Mantoa, havendo prima voluto far alcuni capi de' stratioti cavalieri, i qualli in reame si havia ben portado.