Et zonta ditta letera a Zenoa a hore 4 di note, el dito ambasador andoe incontinente a eseguir quanto era stà ordinato, et il re mostrò averne gran piacer. Tamen, disse non era tempo di vegnir; ma ben di far fatti. Or, a dì 6 octubrio, el prefato re montò in nave a Zenoa, et stete 8 zorni, dove acadete che uno galioto di la galia candiote soracomito Marin Signolo, andato in cima di l'arboro di la nave Grimalda di botte 4000, per far piacer al re si butoe gioso in mar nudo, et fece cossa molto notanda et rara. Adeo, butatosi a li piedi dil re, impetroe che scrivesse a la Signoria in soa recomandatione che fusse asolto dil bando havia di l'isola di Candia. Et cussì scrisse, et la Signoria poi col consejo di pregadi li fece la gratia. Adì 13 octubrio, el re dismontò di nave a Santogerna etc. ... et a dì 15 montò in galia a Rapallo, et a dì 16, partita l'armata per navigar al suo camino, quando fo mia 3 in mar per fortuna tornò a Portofin, et a dì 17 si partì da Portofin a piè e andò per montagna con pioza. A dì 18, el re si partì da Rapallo. A dì 20 zonse a le Specie. A dì 21 montò in galia a le Specie, e quel zorno intrò in Pisa a hore 5 di note. A dì 23 andò a trovar il porto di Ligorne. A dì 24 tornò a Pisa a hore 3 di note. A dì 27 esso re montò su le nostre galie. A dì 29 montoe in nave, e in quel zorno zonse l'armada francese a Ligorne di 3 nave e 3 galioni. Poi el re dismontò, et a dì 9 novembrio di campo vene a Pisa. A dì 11 se partì e andò in campo, e tornò quel zorno a Pisa.