Monsignor di Obignì, justa li capitoli, havendo libertà di poter andar per terra, et lui quello ch'è stà bona causa di far acordarsi Cajeta col re don Fedrico, se ne vene a Roma. Et de lì partito, vene a Fiorenza, et intrò con gran honor a dì 10 zener, come dirò di sotto, et da' fiorentini haver conduta di cavalli fo ditto. El re don Fedrico, expedito di recuperar Cajeta, terminò andar adosso al prefetto fratello dil cardinal San Piero in Vincula, el qual teniva et possideva el duchato de Sora, et in Sora terra fortissima in reame si ritrovava. Et cussì esso re, con le sue zente, vene a campo a le soe terre, et el signor Prospero Colona sempre lo seguitoe, Etiam don Consalvo Fernandes capitano yspano con bellissima gente vene di Calavria a Napoli, et a dì 25 introe in la terra con grandissimo honor, et andoe a trovar il re a la ditta impresa. Et Paulo Capelo cavalier orator nostro etiam esso re seguitoe. Ma el cardinal Borgias legato apostolico ritornoe a Roma, come più difusamente legendo intenderete.
     
     
     
      Nuove dil mexe di decembrio 1496.
     
      [1496 12 02]A dì 2 ditto, vene lettere di Milam come el re di Franza era zonto a Lion a dì 10 novembrio, con la moglie, et che atendeva più a le cosse de Italia che fusse mai. Concludeva ch'el ducha havia paura dil suo stato. El qual ducha meteva ogni celerità in scuoder le tanse e taje poste a li populi di le sue terre, et usava in questo gran crudeltà; et tutti li populi si lamentava, adeo non potevano tollerar le graveze; et pur atendeva acumular oro, né di altro esso ducha si curava, et a quelli non volevano pagar li metteva fanti in caxa, adeo erano ruinati.