Restoe adoncha Zuan Paulo di Manfron et li altri conduteri nominati di sopra, et li cinque contestabili che fo mandati, videlicet Jacometo Novello, Alvise Tealdini, Zuan da Colorno, Zuan da Venecia et Andrea Albanese con fanti 150 per uno, et le forteze erano custodite per nostri provisionati. Da Roma, come, havendo le zente dil pontifice preso uno castello de Orsini chiamato Trivigliano, et volendo meterlo a sacho, spagniuli con alemani veneno a le mane, adeo messeno fuogo li ditti et quello brusoe.
     
      Vene lettere di Spagna, a dì 19, di Jacomo Contarini doctor orator nostro, el qual era zà stato al re di Portogallo et ritornato, et a dì ultimo octubrio era zonto a la corte et abuto audientia da la majestà dil re di Spagna. El qual havia bon animo a conservar la liga, et per esser zà inverno, perhò che le lettere erano de 19 novembrio, le zente erano andate a li alozamenti.
     
      Et pur fo verifichato la trieva mexi tre era fata con il re di Franza, et che quelle cosse si pacificheria, si esso re di Spagna volesse. El qual re sopra tutto vuol el re di Franza, si el vuol far pace, non atendi più a le cosse de Italia.
     
      Item, che Francesco Capelo cavalier era in camino per ritornar, et zonto a Barzelona, et doveva aspetar tempo et pasazo seguro per ritornar a Zenoa.
     
      A Modena, in questo mezo, andoe et se ritrovava do cardinali, videlicet el cardinal Orsini et el cardinal curzense, el qual volse andar in Franza per veder si poteva pacifichar le cosse, mosso da sì, non perhò che altri el mandasse.