Et el cardinal Orsini, volendo vegnir a Veniexia, andò a Ferara et scrisse a suo parente conte de Petigliano, era a li alozamenti a Gedi in brexana, che dovesse otegnir da la Signoria un salvo conduto. Et cussì esso conte andoe a Brexa, et pregoe a Hironimo Donado dotor podestà et Francesco Mocenigo capitano rectori di Brexa, che volesseno scriver a la Signoria di questo salvo conduto, et cussì scrisseno etc.
     
      [1496 12 15]A dì 15 ditto, zonse a Brexa 250 homeni d'arme todeschi benissimo in hordine, i qualli andono verso Milan, et questi veneno a stipendio dil ducha per star a li confini.
     
      Fo mandà a disarmar 4 galie sotil in Istria, zoè Cabriel Barbarigo, Marin Dandolo et Agustin Pasqualigo soracomiti, et questi per nadal veneno in questa [402] terra. Etiam una symbinzana vechia soracomito Piero de Damian. Ancora a Zara fo disarmato Zorzi Cabriel et Francesco Valier. Et il capitano zeneral nostro da mar zonse a Corfù a dì ... novembrio con galie, et ivi restoe con l'armata, insieme con Hieronimo Contarini proveditor di quella.
     
      Vene in questa terra, a dì ... decembrio, Zorzi Zernovich signor di alcuni lochi et montagne vicine a Cataro in Schiavonia, overo a quelli confini, per esser stà privato dal fratello di la signoria col favor dil Turcho, come ho scripto di sora, videlicet Stefano che regna a Montenegro, et Schanderbech terzo fratello sta in paexe dil Turco. Et da Zara, dove lassoe 100 optimi cavalli, vene in questa terra con la moglie nostra zenthildona fo fiola di Antonio Erizo, et arivò a Santa Maria Zubenigo in cha' Pasqualin, et la moglie con gran zoje vestita d'oro etc.