Et etiam lui, ch'è un bellissimo homo et grande vestito d'oro a la grecha, andoe a la Signoria più volte, al qual fo parlato di darli soldo, et fu preso di remandar iterum Alvise Sagudino al Signor turcho per veder che dicto Zorzi Zernovich potesse ritornar nel stato, et etiam ivi dovesse star per quello che bisognava, possa che el Turcho volleva che ivi andasse ambasadori et non aver baylo. Et perhò questo Sagudino fo mandato per esser assà praticho in quelle parte, haver la lengua turcha et grecha. Et cussì partì a dì 1.° zener e andò al suo viazo.
     
      In questi giorni, perché pur su le piaze molto si straparlava di le cosse di la republicha et molte deliberation dil consejo di pregadi se intendeva, nel consejo di X fo preso di far inquisitione sopra quelli revelaveno le cosse secrete, e fono electi tre inquisitori con grande auctoritate di quelli de dicto consejo, zoè Piero Donado, Zuan Morexini et Paulo Pixani cavalier, i qualli spesso se redusevano, più per teror che per altro; adeo in questa terra tanto non si parlava di nuovo, maxime quelli di pregadi tasevano.
     
      In questo mezo, se intendeva francesi, erano in Aste con Zuam Jacomo di Traulzi, atendevano a voller mollestar Zenoa, di la qual molto si dubitava. Et el cardinal San Piero in Vincula era zonto a Turin con 3000 fanti, et sopra questa cossa messer Baptistin di Campo Fregoso molto si fadigava. Adeo, havendo Zenoa con lhoro, il re di Franza poteva dir haver il zuogo averto, per la qual cossa el ducha de Milam molto si dubitava di mutation di stato, la qual cossa seguendo saria la ruina de Italia, privation soa dil dominio che ha in Zenoa, et molti malli d'inde vi seguiria.