El re di Franza, in questo mezo, era a Lion et vene a Garnopoli a piacer, et si deva bon tempo con done, fra le qual con quella di Gonzaga tolta a Guastalla, a la qual fo ditto li donoe uno stado.
     
      Item, havia in Aste et astesana lanze 1200, et feva far gran reputatione a Zuam Jacomo di Traulzi, et non lassava passar niun per andar in Franza che non fusse zerchato si portava lettere. Fo ditto in Aste si aspectava el ducha di Orliens, et che 'l re feva preparamento al tutto di vegnir questo anno in Italia, et volleva condur 500 passavolanti su 500 carete tirate da 2 cavalli per una, et ogni passavolante el suo bombardier con el so famejo, e una careta con polvere et ballote etc.
     
      Item, che in Provenza l'armata se ingrossava, sopra la qual saria 10 milia combatenti, et che 'l re [404] havia scritto a' fiorentini dovesseno star saldi che presto vegneria ajutadi.
     
      [1496 12 24]A dì 24 decembrio, la vezilia di nadal, si rompete sora porto la nave di ser Alvise Soranzo di botte 300, la qual veniva vuoda perhoché era stà nolizada per formenti da ser Benetto Zustignam in Cicilia, et non potè cargar, et cussì si rompete per gran furia di vento. Ancora in questo mexe la nave dil Zimera carga di zenere, veniva di Baruto, volendo tuor il parizo da Parenzo in qua, più di ditta nave né de li homeni se intese alcuna cossa. Fo judichato fosse andata a piombino in mar et da quello ingiotita. Etiam la nave di ser Cosma Pasqualigo, fo ditto et non fu vero, vene nova esser rota; ergo 2 nave nostre si rupetero.