Et che quella matina che 'l se voleva partir, fo a dì 14, l'azonse uno messo di la majestà sua con una lettera, per la qual ge comesse non si dovesse partir de lì. Et quella sera a hore 2 ditta majestà ivi agionse, et subito mandò do di so baroni a visitar el prefatto orator. Et a dì 15 li volse dar audientia, et cussì, insieme Zacaria Contarini cavalier orator nostro che di Augusta ivi era venuto, andoe a l'audientia, et trovono la majestà regia in uno trichlinio, et apresentate le lettere credential, et lecte, poi fece una elegante oratione, et il re poi li ordinò andasseno tutti doi oratori in Augusta insieme con lui, et cussì andono a caza. A dì 16 zonseno in Augusta, et a dì 18 li presentò alcuni presenti di salvadicine prese, et a dì 20 da esso re si partì el Contarini collega et ritornò in questa terra. Et a dì 21 vi gionse l'archiducha Philippo di Bergogna fiol unicho di la preditta majestà, contra dil qual andoe tutti li principi, signori et oratori erano lì, et con gran numero de cavali introe. Et a dì 22, esso orator nomine dominii habuit orationem praefati archiduci dal qual fo carezato etc. A dì 24, el ditto archiducha si partì da Augusta per andar a trovar il re suo padre, et a dì 28 azonse a Yspruch, dove el giorno avanti era gionto el re. Et a dì 3 lujo se partì da Yspruch. Et a dì 5 el re si partì per vegnir a Malz, et ordinò a li oratori non si partisseno fin do zorni, per rispetto che per la via li alozamenti erano tristi. A dì 8 el se partì, et a dì 13 arivoe a Nandres, mia 15 da Malz.