Quale Zorzi, intendendo la trama, se havea imbarchato a Budua con la dona sua, fo fia di domino Antonio Erizo zenthilomo nostro, e robe sue, et tegniva la volta de qui. Et in questo modo el ditto suo fradello li tolse la signoria. Quelli di Sterniza, volendo tornar soto la pristina devution di la Signoria, erano venuti dal conte a dirli questo. El qual loco di Sterniza, è in confinibus Catari, occupato era stà per forza da ditto conte Zorzi zà più tempo. Unde, consultato inter patres, fo deliberà di mandar Alvixe Sagudino secretario a Scutari al sanzacho per ditta causa, et per meter i confini a Antivari, con presenti per ducati 250, acciò ditto Stefano non faci garbujo, come feva con esso Zorzi. El qual sanzacho nome Perisacha, et ha auctorità grande, et spera di esser bassà.
     
      [1496 12 07]A dì 7 ditto, lettere da Pisa dai provedadori a Cassina dil solizitar i alozamenti, et penuria de strami e biava da cavali, exortatione ad alozar in Lombardia.
     
      Item, el campo de' fiorentini esser a Soiana e Terizola con fanti 300. Nostri cavalchorono et fezeno ritrar ditte zente. Et dil partir di Maximiano, el qual non volse intrar in Petrasancta; ma feze la via de Mezacroxe.
     
      Da Roma, di 1.°, come le zente dil papa andavano per poner campo nell'Isola, loco Orsino.
     
      Item, che Zan Zordam Napello era a Conietello con 300 fanti et 50 homeni d'arme, et che, partiti da Isola, doveano andar a Vicovaro.
     
      Item, che 'l papa non volea nominar Federico re per esser debitor di 50 milia lire de sterlini, et 48 milia per feudo scorso, che sono ducati 200 milia.