Item, che 'l ducha di Savoia mandava a Maximiano uno suo orator.
     
      Lettere dil proveditor di l'armada Malipiero de 29. Et primo, dil zonzer di la nave Soranza lì.
     
      Item, che la parte Flischa, qual domina quella Riviera, per bona via havia inteso voleva cazar Adorni dil stato di Zenoa, et perhò dubitava andarvi lì in Zenoa con le galie per questa tal turbation.
     
      Da Pisa, de 29 et di 1°, 2° et 4°, come i nimici squadre 11, fanti 2000, e plui, haveano abuto Terizola a pati, e andavano verso Cassina. Stratioti desobedienti se levavano per Lombardia per deffetto de strami e danari. La designation di l'orator pisano qui, domino Beneto di Beneti, per notificar a la Signoria el stato et condition di quella cità.
     
      Da Roma, di 4 et 5, el campo dil papa a Isola. Item, che 'l pontifice non invidava Maximiano a la corona, per la importantia de la spexa.
     
      Item, che haveano avixi che 'l re di Franza era per vegnir in Italia.
     
      Item, da Terazina, come era rota una barza conducea francesi da Cajeta, zoè il castelan con 300 altri, di quali erano scapolati solum 30.
     
      Da Cajeta, di 29, 30, et 1.° de l'instante, de l'intrar dil re in dita terra, alozato in castello con festa. De' francesi, uno galion trovarsi ancor in porto. Di quelli di Baya, non si dicea altro.
     
      [423] Item, come il re don Fedrico havia dato provision in Trane di una caxa et altro ai fioli fo di domino Francesco Morexini cognominato da Zara, morto in l'impresa dil regno a' servicii dil signor re Ferando.
     
      Da Pisa, come el campo de' fiorentini si ritrovava a San Piero verso Canapoli, et volea andar recuperando castelli.